食在广州:雨帽街云吞面广州美食快报Hopetr

2020-05-29    收藏897
点击次数:647

□江晖

老街坊最爱嘅云吞面,莫过于当年雨帽街面档嘅出品。呢种传统云吞面,之前我只认定连新路有得食,但有日,我竟然喺杨箕一间云吞面铺揾到同样嘅感觉。一睇面铺简介,原来就系当年雨帽街面档主理人之一主理嘅,怪唔知碗面冇堿水味之余又够弹牙,汤底云吞都一样够味。

据闻面要做到弹牙,一定要用鸭蛋混面粉,仲要用竹升扤住嚟全手工打面先可以做出呢个效果。面汤都十分重要,就系用大量大地鱼、虾头、虾籽、虾壳熬猪骨汤。我哋经常闻到面店传出嘅香味,主要就系大地鱼嘅功劳嘞。

听老窦讲,50年前去雨帽街食碗面好平嘅啫,斋面5分钱,云吞面(大碗叫大蓉,细碗叫细蓉)都系两毫子。阿爷六几年嗰时成日都会带一家六口去帮衬;老窦阿妈拍拖都纯洁到去食碗面;我十岁前后都有经常去,所以我哋一家对云吞面要求都好高。后来中山五路改造,雨帽街面档冇咗后,我哋都唔轻易食云吞面,直到几年前我发现连新路间店有水準,又唔贵,五、六蚊都可以食到好饱,性价比高。哗,而家更加好,又发现多间,虽然呢间价钱贵啲,去到八、九蚊,但我都认为系物有所值。难怪大美食家蔡澜都讲过,传统云吞面都仲系喺广州嘞。

相关文章  RELEVANT ARTICLES